News - Egypt Defense Expo-ում հայաստանյան տաղավարում ներկայացված են 12 ընկերություններ

Եգիպտոսի մայրաքաղաք Կահիրեում երկուշաբթի օրը մեկնարկել է 2023 Egypt Defense Expo (EDEX) պաշտպանական և անվտանգության տեխնոլոգիաների միջազգային ցուցահանդեսը։ Նրա պաշտոնական բացմանը մասնակցում էր նաև Հայաստանի բարձր տեխնոլոգիական արդյունաբերության նախարարության պատվիրակությունը՝ նախարար Ռոբերտ Խաչատրյանի գլխավորությամբ։ Հայաստանի բարձր տեխնոլոգիական արդյունաբերության նախարարությունից NEWS.am -ին հայտնում են, որ այս ցուցահանդեսում Հայաստանից 12 ընկերություններ Հայաստանի տաղավարում ներկայացնում են իրենց լուծումներն ու արտադրանքը պաշտպանության և անվտանգության ոլորտներում։ Նախարար Ռոբերտ Խաչատրյանն այցելել է հայկական տաղավար, ինչպես նաև շրջել թեմատիկ ցուցասրահներում, ծանոթացել պաշտպանական և անվտանգության նորագույն տեխնոլոգիական լուծումներին, սարքավորումներին և համակարգերին, որոնք օգտագործվում են ցամաքում, ծովում և օդում։