News - Դեսպան Մարագոս. ԵՄ-ն նպաստում է Հայաստանում շարունակվող ոլորտային բարեփոխումներին

ՀՀ կրթության, գիտության, մշակույթի և սպորտի փոխնախարար Արթուր Մարտիրոսյանը մասնակցել է «Ճկուն ապագայի կառուցում. երիտասարդության դերը Հայաստանի և Եվրոպայի արդի մարտահրավերներին դիմակայելու գործում» թեմայով քննարկմանը։ ՀՀ կրթության, գիտության, մշակույթի և սպորտի նախարարությունից NEWS.am-ին հայտնում են, որ միջոցառմանը ներկա է եղել նաև Հայաստանում Եվրոպական միության պատվիրակության ղեկավար, դեսպան Վասիլիս Մարագոսը։ Քննարկումը կազմակերպվել էր «Ըմբռնումով Եվրոպայի» ծրագրի համակարգողների տարեկան հանդիպման շրջանակներում, որին մասնակցում էին շուրջ 40 երիտասարդներ Հայաստանից և տասը եվրոպական երկրներից։ Ողջունելով քննարկողներին՝ փոխնախարար Մարտիրոսյանը կարևորեց երիտասարդության դերը Հայաստանի պետական ​​քաղաքականության և ռազմավարական ծրագրերում։ Դեսպան Մարագոսն իր հերթին ընդգծել է, որ տարբեր ծրագրերի իրականացման միջոցով համագործակցելով ՀՀ կառավարության հետ՝ ԵՄ-ն նպաստում է Հայաստանում ընթացող ոլորտային բարեփոխումներին։ Քննարկման ընթացքում վերոնշյալ ծրագրի մասնակիցները բանախոսներին ուղղեցին հարցեր, որոնք վերաբերում էին կրթության և երիտասարդության խնդիրներին։