News - Լոնդոնում կայացել են Հայաստան-Մեծ Բրիտանիա պաշտպանության ռազմավարական 6-րդ խորհրդակցությունները (ՖՈՏՈ)

Երեքշաբթի Լոնդոնում կայացել են Հայաստան-Միացյալ Թագավորություն (Մեծ Բրիտանիա) պաշտպանության ռազմավարական վեցերորդ խորհրդակցությունները։ ՊՆ-ից NEWS.am-ին հայտնում են, որ հայկական պատվիրակությունը գլխավորում էր ՀՀ ՊՆ պաշտպանական քաղաքականության և միջազգային համագործակցության գլխավոր վարչության պետ Լևոն Այվազյանը։ Քննարկվել են տարածաշրջանային և միջազգային անվտանգությունը, ինչպես նաև պաշտպանության ոլորտում երկկողմ համագործակցությունը։ Այվազյանը ՄԹ գործընկերներին ներկայացրել է Հայաստանի շուրջ ստեղծված անվտանգության իրավիճակը և վերջինիս քայլերը տարածաշրջանային խաղաղության և կայունության ուղղությամբ, այդ թվում՝ Հայաստանի «Խաղաղության խաչմերուկ» նախագիծը։ Ներկայացվել են նաև Հայաստանի զինված ուժերում իրականացվող լայնածավալ բարեփոխումները։ Բացի այդ, կողմերը հանգամանալից քննարկել են Հայաստան-Մեծ Բրիտանիա երկկողմ ռազմական համագործակցության ներկա ընթացքը և զարգացման հեռանկարները։ Երկուստեք նշվել է մի շարք նոր ոլորտներում համագործակցության զգալի ներուժը և ձեռք բերված պայմանավորվածությունները կյանքի կոչելու պատրաստակամությունը։ Այս խորհրդակցությունների արդյունքում Լևոն Այվազյանը և ՄԹ ՊՆ Ռուսաստանի, Արևելյան Եվրոպայի և Կենտրոնական Ասիայի քաղաքականության տնօրեն Դեյվիդ Մորգանը ստորագրեցին պաշտպանության ոլորտում Հայաստանի և Միացյալ Թագավորության միջև համագործակցության 2023/24 թթ. Նաև պայմանավորվածություն է ձեռք բերվել Հայաստանի մայրաքաղաք Երևանում անցկացնել Հայաստան-Մեծ Բրիտանիա պաշտպանական ռազմավարական յոթերորդ խորհրդակցությունները։