News - Մհեր Գրիգորյանը՝ ԱԶԲ ղեկավարին. Համատեղ ծրագրերը համահունչ են ՀՀ կառավարության ռազմավարական առաջնահերթություններին

ՀՀ կառավարության մամուլի ծառայությունից NEWS.am -ին հայտնում են, որ փոխվարչապետ Մհեր Գրիգորյանն ընդունել է Ասիական զարգացման բանկի (ԱԶԲ) նախագահ Մասացուգու Ասակավային։ Ողջունելով հյուրին՝ փոխվարչապետը բարձր է գնահատել ԱԶԲ-ի հետ Հայաստանի համագործակցությունը և նշել, որ համատեղ իրականացվող ծրագրերը համահունչ են ՀՀ կառավարության ռազմավարական առաջնահերթություններին։ Գրիգորյանն ընդգծել է ԱԶԲ-ի անմիջական համագործակցությունը մասնավոր հատվածի ընկերությունների հետ և ընդգծել դրա կարևորությունը Հայաստանում ճիշտ բիզնես մշակույթի զարգացման գործում։ Հանդիպման ընթացքում փոխվարչապետը ԱԶԲ նախագահին ներկայացրել է Լեռնային Ղարաբաղից բռնի տեղահանված հայերի հիմնական կարիքները և ՀՀ կառավարության կողմից իրականացվող համապատասխան աջակցության միջոցառումները, ինչպես նաև անդրադարձել երկարաժամկետ լուծում պահանջող խնդիրներին։ Զրուցակիցներն ընդգծել են ենթակառուցվածքների և մարդկային կապիտալի զարգացման ոլորտում համագործակցության ընդլայնման կարևորությունը։ Մտքեր փոխանակվեցին նաև զբաղվածության և թվայնացման ոլորտում անհրաժեշտ բարեփոխումների շուրջ։