News - Հայաստանն առաջին անգամ է մասնակցում Ստրասբուրգի Սուրբ Ծննդյան տոնավաճառին

Կրթության, գիտության, մշակույթի և սպորտի նախարարության նախաձեռնությամբ Հայաստանն առաջին անգամ է մասնակցում Ստրասբուրգի Սուրբ Ծննդյան տոնավաճառին։ Աշխարհահռչակ այս տոնավաճառում ներկայացված են ավելի քան 60 հայ արհեստավորների շուրջ 400 տեսակի ձեռագործ աշխատանքներ։ Հայկական մոտիվներով ստեղծված Սուրբ Ծննդյան և Ամանորի խորհրդանիշները նոյեմբերի 24-ից դեկտեմբերի 24-ը կզարդարեն Ֆրանսիայի Ստրասբուրգ քաղաքի Սուրբ Թոմաս հրապարակում գտնվող հայկական տաղավարը։ Հայկական տաղավար այցելուներին առաջարկվում են հայկական կենսունակ ժառանգության լավագույն օրինակները, ներառյալ գորգագործությունը, ասեղնագործությունը, գոբելենը և փայտագործությունը: Համաեվրոպական այս խոշոր հարթակում ներկայացվածությունը կնպաստի հայկական մշակութային ժառանգության միջազգային հանրահռչակմանը, ինչպես նաև միջմշակութային երկխոսության ձեռքբերմանը և ընդլայնմանը: Հայաստանի առաջին մասնակցությունը Ստրասբուրգի Սուրբ Ծննդյան տոնավաճառին նշանավորվեց նրա տաղավարի բացման արարողությամբ, որին կմասնակցեն Ֆրանսիայի և Հայաստանի բարձրաստիճան պաշտոնյաներ։