News - Ալեն Սիմոնյան. Հայկական լեռնաշխարհից հայկական հետքը ջնջելու ադրբեջանական փորձերն անընդունելի են

Ադրբեջանը սիրում է ասել, որ ինքը բազմամշակութային երկիր է, բայց համառորեն ջնջում է հայկական ամեն ինչ՝ սկսած հայերի էթնիկ զտումներից, վերջացրած հայկական եկեղեցիների ու շինությունների վերացումով։ Այս մասին երեքշաբթի ԱԺ-ում լրագրողների հետ զրույցում ասաց ՀՀ ԱԺ նախագահ Ալեն Սիմոնյանը։ «Այլ վայրեր էլ կային, որտեղ նրանք [այսինքն՝ ադրբեջանցիները] փորձում էին ջնջել հայկական պատմական ներկայությունը, բայց հետո հասկացան, որ դա միայն վնասում է երկրի հեղինակությանը: Համաշխարհային պատմությունը մեկ օրում չես խմբագրի, կան ընդհանուր պատմական սկզբունքներ, որոնք նույնն են. Շաքար ասելով ձեր բերանը չի քաղցրանա, ես անընդունելի եմ համարում հայկական հետքը, հայոց պատմությունը Հայկական լեռնաշխարհից ջնջելու [ադրբեջանական] փորձերը»,- ասաց Սիմոնյանը։ Նա կոչ արեց 30 տարվա օկուպացիաների մասին խոսելու, տարբեր պատմական քարտեզներ հայկական կողմ բերելու փոխարեն նստել ու քննարկել ապագան։ «Բավական է, պետք է դադար տալ, պետք է խոսել ապագայի մասին, թող իրենց ջանքերն օգտագործեն ապագան կերտելու և տարածաշրջանում խաղաղություն հաստատելու համար: Սա չի կարող հավերժ լինել»,- շեշտեց Հայաստանի խորհրդարանի խոսնակը։