News - ՄԱԿ-ի հատուկ զեկուցող. Ես ցավ եմ տեսել ղարաբաղցի փախստականների աչքերում և կոտրված հոգով հեռանում եմ Հայաստանից.

Միջազգային հանրությունը պետք է դիտարկի Լեռնային Ղարաբաղում նյութական և ոչ նյութական ժառանգության պաշտպանության մեխանիզմների ստեղծման հնարավորությունը։ Այս մասին Հայաստան կատարած այցին հաջորդած մամուլի ասուլիսում ասաց ճշմարտության, արդարության, հատուցման և չկրկնվելու երաշխիքների աջակցման հարցերով ՄԱԿ-ի հատուկ զեկուցող Ֆաբիան Սալվիոլին։ Նա նշել է, որ այցը համընկել է Լեռնային Ղարաբաղից ավելի քան 110 հազար հայերի բռնի տեղահանման հետ։ «Ես հանդիպեցի փախստականների և նրանց ընդունող համայնքների հետ: Ես ցավ տեսա փախստականների աչքերում և լսեցի նրանց խնդիրները։ Ես տեսա իշխանությունների վիթխարի աշխատանքը»,- նշել է հատուկ զեկուցողը։ Նրա խոսքով, չնայած իշխանությունների ջանքերին, միջնաժամկետ լուծումների համար անհրաժեշտ է միջազգային աջակցություն, ինչպես նաև անհրաժեշտ է դյուրացնել գրանցման մեխանիզմները՝ անկախ փախստականների քաղաքացիական կարգավիճակից։ «Փախստականները նշել են, որ փաստաթղթերը մնացել են ԼՂ-ում, և անհրաժեշտ է դրանք պահպանել՝ ընդգծելով գերեզմանների և հուշարձանների պահպանության անհրաժեշտությունը։ Այս առումով հորդորում եմ բանակցող կողմերին և միջազգային հանրությանը դիտարկել նյութական և ոչ նյութական ժառանգության պաշտպանության մեխանիզմների ստեղծման հնարավորությունը։ Անհրաժեշտ է վերադարձնել գերիներին ու պատանդներին, փոխհատուցել զոհերի հարազատներին։ Դա պետք է արվի միջազգային հանրության հովանու ներքո, որպեսզի բռնությունը չկրկնվի: Եվ դա պետք է արտացոլվի ապագա խաղաղության համաձայնագրում»,- ասել է ՄԱԿ-ի հատուկ զեկուցողը։ «Ես հեռանում եմ Հայաստանից կոտրված հոգով»,- ասաց Ֆաբիան Սալվիոլին՝ ընդգծելով խաղաղության պայմանագրին ձգտելու անհրաժեշտությունը։