News - Հայաստանի վարչապետ. Հայերի վերադարձը Լեռնային Ղարաբաղ ներկայումս անիրատեսական է

Բռնի տեղահանված հայերի վերադարձը Լեռնային Ղարաբաղ քննարկվում է, այդ թվում՝ միջազգային հարթակներում, սակայն այսօրվա դրությամբ դա իրատեսական չէ։ Այդ մասին ուրբաթ օրը կայացած հեռուստատեսային ասուլիսում ասաց ՀՀ վարչապետ Նիկոլ Փաշինյանը։ Նա նշեց, որ սեպտեմբերի 19-ից հետո իրավիճակը, որը ստիպեց հայերին լքել Լեռնային Ղարաբաղը, ինչպես նաև էթնիկ զտումների քաղաքականությունը, չեն փոխվել։ Նրա խոսքով, եթե այդ մարդկանց վերադարձն այսօր իրատեսական լիներ, նրանք չէին լքի Լեռնային Ղարաբաղը. «Եթե Լեռնային Ղարաբաղից բռնի տեղահանված հայերը հնարավորություն չունենան վերադառնալ իրենց տները, ապա մենք ամեն ինչ անելու ենք, որպեսզի նրանք մնան Հայաստանում և չարտագաղթեն մեր երկրից»,- ընդգծեց Փաշինյանը։ Նա հիշեցրեց, որ Լեռնային Ղարաբաղից բռնի տեղահանումից հետո ղարաբաղցի հայերի մեծ արտահոսք է եղել Հայաստանից, սակայն հետագայում հետընթաց է գրանցվել։ Միաժամանակ նա գոհունակությամբ նշեց, որ այսօր ղարաբաղցիների շրջանում արտագաղթի էական միտումներ չկան։ Նիկոլ Փաշինյանը հույս է հայտնել, որ Լեռնային Ղարաբաղի հայերը շուտով կդիմեն ՀՀ քաղաքացիություն ստանալու համար և լիովին կինտեգրվեն երկրի կյանքին, եթե չունենան օբյեկտիվ հնարավորություններ և ցանկություն՝ վերադառնալու Լեռնային Ղարաբաղ։