News - Հայաստանի և Հնդկաստանի ԱԳՆ-ները քաղաքական խորհրդակցություններ ունեն

Նոյեմբերի 18-ին Նյու Դելիում տեղի ունեցավ Հայաստանի Հանրապետության արտաքին գործերի նախարարության և Հնդկաստանի Հանրապետության արտաքին գործերի նախարարության միջև քաղաքական խորհրդակցությունների 10-րդ փուլը։ Խորհրդակցությունները համանախագահել են Հայաստանի Հանրապետության արտաքին գործերի նախարարի տեղակալ Մնացական Սաֆարյանը և Հնդկաստանի Հանրապետության արտաքին գործերի նախարարության քարտուղար (Արևմուտք) Սանջայ Վերման, հայտնում է ՀՀ ԱԳՆ-ն։ Կողմերը քննարկել են համագործակցության վերջին դինամիկ զարգացման հարցերը՝ խարսխված ավանդական բարեկամության և քաղաքակրթական կապերի, բարձր մակարդակի երկկողմ փոխգործակցության և երկխոսության օրակարգի վրա։ Զրուցակիցներն անդրադարձել են նաև առևտրատնտեսական կապերի ընդլայնմանը, հաղորդակցական տարբեր նախաձեռնությունների իրականացմանը և մի շարք բազմակողմ հարթակներում փոխշահավետ համագործակցությանը։ Մնացական Սաֆարյանը Հայաստանի արտաքին գործերի նախարարի ողջույնները փոխանցեց Հնդկաստանի արտաքին գործերի նախարար Սուբրահմանյամ Ջայշանքարին։ Հայաստանի փոխարտգործնախարարը ներկայացրեց «Խաղաղության խաչմերուկ» նախաձեռնությունը՝ ընդգծելով դրա առավելությունները թե՛ տնտեսական համատեքստում, թե՛ որպես տարածաշրջանի երկրների համար խաղաղության երաշխիք։ Կողմերն անդրադարձել են Հայաստան-Ադրբեջան հարաբերությունների կարգավորմանն ուղղված միջազգային ջանքերին։ Մնացական Սաֆարյանն իր գործընկերոջը ներկայացրել է Ադրբեջանի կողմից իրականացվող Լեռնային Ղարաբաղի էթնիկ զտումների քաղաքականության հետևանքով ավելի քան 100.000 բռնի տեղահանված հայերին պատշաճ կերպով ընդունելու համար Հայաստանի կառավարության ձեռնարկած միջոցառումները՝ ընդգծելով միջազգային գործընկերների աջակցության կարևորությունը։ Հնդկաստանի Հանրապետության արտաքին գործերի և մշակույթի պետական ​​նախարար Մեենակշի Լեխիի հետ մտքեր են փոխանակվել նախատեսված կրթական և մշակութային ծրագրերի իրականացման և այլ ոլորտներում փոխշահավետ համագործակցության հնարավորությունների վերաբերյալ։ Ընդգծվել է Հարավային Կովկասում հայկական պատմամշակութային ժառանգության պաշտպանության կարևորությունը։