News - Նիկոլ Փաշինյանը և Պիա Կաուման քննարկել են Հայաստան-Ադրբեջան հարաբերությունների կարգավորման գործընթացը

Վարչապետ Նիկոլ Փաշինյանն ուրբաթ ընդունել է ԵԱՀԿ Խորհրդարանական վեհաժողովի (ԽՎ) նախագահ Պիա Կաումայի գլխավորած պատվիրակությանը։ Այս մասին հայտնում են վարչապետի աշխատակազմից։ Վարչապետն ընդգծել է այն փաստը, որ ԵԱՀԿ ԽՎ նստաշրջանն առաջին անգամ է անցկացվելու Երեւանում և հույս հայտնել, որ նստաշրջանի շրջանակներում տեղի կունենան արդյունավետ քննարկումներ և ակտիվ երկխոսություն։ Պիա Կաուման շնորհակալություն է հայտնել ԵԱՀԿ ԽՎ նիստը բարձր մակարդակով կազմակերպելու և հյուրընկալելու համար՝ հավելելով, որ քննարկվելու են Հարավային Կովկասում և միջազգային ասպարեզում տեղի ունեցող գործընթացները։ Կողմերն անդրադարձել են Ադրբեջանի էթնիկ զտումների քաղաքականության հետեւանքով Լեռնային Ղարաբաղից բռնի տեղահանված ավելի քան 100.000 մարդկանց հումանիտար խնդիրներին, ինչպես նաև դրանց հաղթահարման ուղղությամբ Հայաստանի կառավարության ձեռնարկած քայլերին։ Ընդգծվել է միջազգային հանրության աջակցությունը առկա խնդիրների լուծման գործում։ Զրուցակիցները քննարկել են Հայաստան-Ադրբեջան հարաբերությունների կարգավորման գործընթացին վերաբերող հարցեր։ Ընդգծվել է մայիսի 14-ին և հուլիսի 15-ին Բրյուսելում կայացած եռակողմ հանդիպումներում համաձայնեցված սկզբունքների հիման վրա խաղաղ գործընթացի շարունակման կարևորությունը։ Նիկոլ Փաշինյանը և Պիա Կաուման մտքեր են փոխանակել տարածաշրջանային խաղաղության և կայունության, ինչպես նաև փոխադարձ հետաքրքրություն ներկայացնող այլ հարցերի շուրջ։