News - ԵՄ դիտորդների թվի ավելացումը ավելի կամրապնդի կայունությունը սահմաններին

Հայաստանի փոխարտգործնախարար Պարույր Հովհաննիսյանը մեկնաբանել է Եվրոպական միության (ԵՄ) Արտաքին հարաբերությունների խորհրդի որոշումը՝ ընդլայնելու ԵՄ քաղաքացիական մոնիտորինգի առաքելությունը Հայաստանում (EUMA): Հովհաննիսյանը լրագրողների հետ ճեպազրույցում ասաց, որ երկար ժամանակ քննարկվում էր EUMA-ի ընդլայնման հարցը, հաղորդում է «Արմենպրես»-ը: «Որոշում կա ընդլայնել դիտորդների թիվը, ուժեղացնել նրանց կարողությունները, ինչը հնարավորություն կտա մոնիտորինգի հետ կապված ավելի ակտիվ աշխատանք տանել, համապատասխան հաշվետվություններ ներկայացնել Բրյուսելին և անդամ երկրներին. մի բան, որն անկասկած ավելի կամրապնդի կայունությունը մեր սահմաններում»,- ասաց Հովհաննիսյանը։ EUMA-ի ընդլայնման մասին որոշումը նշանակում է, որ դիտորդների թիվը կավելանա և նրանց կարողությունները կամրապնդվեն, պարզաբանեց փոխարտգործնախարարը։ Նա հավելեց, որ դեռ պարզ չէ, թե որքանով կավելանա ԵՄ դիտորդների թիվը Հայաստանում, սակայն կարծիք հայտնեց, որ պետք է համապատասխան քանակ տրամադրվի, որպեսզի աշխատանքն ավելի արդյունավետ իրականացվի։ Հովհաննիսյանը հավելեց, որ համապատասխան աշխատանքներն արագ կսկսվեն և ուշացումներ չեն լինի։