News - Հայաստանի օմբուդսմենը և Շվեյցարիայի դեսպանն անդրադարձել են Ղարաբաղից տեղահանված անձանց իրավունքների պաշտպանությանը.

Մարդու իրավունքների պաշտպանի գրասենյակից NEWS.am -ին հայտնում են, որ Հայաստանի մարդու իրավունքների պաշտպան Անահիտ Մանասյանը երկուշաբթի ընդունել է Շվեյցարիայի դեսպան Լուկաս Ռոզենկրանցին։ Օմբուդսմենը դիվանագետին ներկայացրել է Լեռնային Ղարաբաղից բռնի տեղահանված հայերի իրավունքների պաշտպանությանն առնչվող մի շարք հարցեր, անդրադարձել համապատասխան խնդիրներին ու կարիքներին, ինչպես նաև իր և իր աշխատակազմի կողմից իրականացվող փաստահավաք աշխատանքներին։ Մանասյանն ընդգծել է, որ իր աշխատանքի առաջնահերթություններից է Լեռնային Ղարաբաղից բռնի տեղահանվածների իրավունքների պաշտպանությունը։ Փաստահավաք աշխատանքները շարունակվում են, և դրանց վերջնական արդյունքները կամփոփվեն և կներկայացվեն Հայաստանի իշխանություններին և միջազգային դերակատարներին։ Հանդիպման ընթացքում Մանասյանը խոսել է նաև ՀՀ մարդու իրավունքների պաշտպանի գրասենյակի գործունեության առաջնահերթությունների մասին։ Դեսպան Ռոզենկրանցն իր հերթին շնորհակալություն է հայտնել օմբուդսմենին ընդունելության և արդյունավետ քննարկման համար։