News - Ինդոնեզիայի նորանշանակ դեսպանն իր հավատարմագրերի պատճենն է հանձնել Հայաստանի արտաքին գործերի նախարարի տեղակալին

Նոյեմբերի 13-ին ԱԳ նախարարի տեղակալ Մնացական Սաֆարյանն ընդունեց Հայաստանի Հանրապետությունում Ինդոնեզիայի Հանրապետության դեսպան Արիֆ Մուհամադ Բասալամահին (նստավայրը՝ Կիև)՝ հավատարմագրերի պատճենի հանձնման կապակցությամբ։ Այս մասին հայտնում է ԱԳՆ-ն։ Փոխնախարար Սաֆարյանը շնորհավորել է նորանշանակ դեսպանին պաշտոնը ստանձնելու կապակցությամբ և մաղթել բեղմնավոր ու հաջող պաշտոնավարում՝ ուղղված հայ-ինդոնեզական կապերի ամրապնդմանը։ Փոխարտգործնախարարը համառոտ ներկայացրել է տարածաշրջանում խաղաղության հաստատմանն ուղղված Հայաստանի ջանքերը՝ միաժամանակ ներկայացնելով Լեռնային Ղարաբաղի ժողովրդի բռնի տեղահանմանը հաջորդած իրավիճակը՝ որպես Ադրբեջանի կողմից իրականացվող էթնիկ զտումների քաղաքականության հետևանք։ Մնացական Սաֆարյանը ներկայացրել է նաեւ Հայաստանի կառավարության «Խաղաղության խաչմերուկ» նախագիծը։ Կողմերը քննարկել են ընթացիկ երկկողմ հարաբերությունները և մտքեր փոխանակել բազմակողմ հարթակներում համագործակցության խորացման, առևտրատնտեսական կապերի խթանման, ինչպես նաև գիտության, կրթության և տեխնոլոգիաների ոլորտներում առկա համագործակցության ընդլայնման շուրջ։