News - Անվտանգության խորհրդի ղեկավար. Հայաստանը պատրաստ է գալ Բրյուսել, հասնել վերջնակետին, խաղաղության պայմանագիր կնքել Ադրբեջանի հետ

Լիդերների մակարդակով ծրագրված հանդիպում էր, որը պետք է կայանար հոկտեմբերի վերջին, Հայաստանը պատրաստակամություն էր հայտնել գալ այդ հանդիպմանը, բայց, ցավոք, հանդիպումը չկայացավ։ Հուսով ենք, որ դա հնարավոր կլինի մոտ ապագայում։ Այս մասին ուրբաթ օրը Բրյուսելում անցկացվող «Հայաստանի ռազմավարական ապագա. ՀՀ-Եվրոպա» համաժողովի ժամանակ ասաց ՀՀ անվտանգության խորհրդի քարտուղար Արմեն Գրիգորյանը։ «Հայաստանը պատրաստ է Բրյուսելում կայանալիք եռակողմ հանդիպմանը։ Հայաստանը պատրաստ է խաղաղության։ Մենք [Հայաստանը] ստացել ենք խաղաղության հաստատման մանդատ։ Այս պահին մենք ցանկանում ենք, որ հստակեցվի Հայաստանի և Ադրբեջանի սահմանը, տարածքային ամբողջականությունը։ Հայաստանի 29800 քառակուսի կիլոմետրը հրապարակայնորեն հաստատվի, իսկ ապաշրջափակումը տեղի ունենա չորս սկզբունքների հիման վրա. «Սրանք կարևոր սկզբունքներ են, որոնց հիման վրա մենք պատրաստ ենք ավարտել [խաղաղության] բանակցությունները, ինչպես նաև լուծել բոլոր հումանիտար խնդիրները, որոնք կան։ Կարևոր հարցերից մեկը գերիների վերադարձն է և խաղաղության հաստատումը։ «Հայաստանը պատրաստ է այս օրակարգով շարունակել [խաղաղության] բանակցությունները, գալ Բրյուսել, հասնել վերջնակետին և ստորագրել խաղաղության պայմանագիրը [Ադրբեջանի հետ]»,- ընդգծել է Հայաստանի Անվտանգության խորհրդի քարտուղարը։