News - Հայաստանում ԵՄ առաքելությունը Գերմանիայի արտգործնախարարին է ներկայացրել Երասխի սահմանային իրավիճակը

Գերմանիայի արտաքին գործերի նախարար Անալենա Բաերբոքն այցելել է Արարատի մարզի Երասխ համայնք, տեղեկացնում է «Արմենպրես»-ը: Գերմանիայի արտգործնախարարին դիմավորել է Հայաստանում Եվրոպական միության դիտորդական առաքելության ղեկավարի տեղակալ Մարեկ Կուբերսկին։ Դիտորդները Գերմանիայի արտգործնախարարին ուղեկցել են այն վայր, որտեղ նախատեսվում էր հայ-ամերիկյան ներդրումներով մետաղագործական գործարան կառուցել։ Գործարանում շինարարական աշխատանքները դադարեցվել են ադրբեջանական զինուժի կողմից պարբերաբար գնդակոծությունների պատճառով։ Օրերս Հայաստանի էկոնոմիկայի նախարար Վահան Քերոբյանը հայտարարեց, որ գործարանը կկառուցվի այլ վայրում։ Կուբերսկին Գերմանիայի արտաքին գործերի նախարարին ցույց է տվել գործարանի վարչական շենքի պատերին հրետակոծության հետքեր և ծանոթացրել դրա հետ կապված պատմությանը՝ նշելով, որ գործարանը կառուցվելու է այլ վայրում։ Կուբերսկին տեղեկացրել է Baerbock-ին, որ իրենք դիտորդական առաքելություն են իրականացնում վեց օպերատիվ դիտորդական բազաներից։ Նա նշեց, որ այն պահերին, երբ դիտարկում են սահմանամերձ շրջանները, ընդհանուր առմամբ, միջադեպեր չեն լինում, իրավիճակը հանգիստ է։ Գերմանիայի արտգործնախարարին հետաքրքրում էր նաև, թե որքանով է հեռու Երասխը ադրբեջանական դիտակետերից, ինչպես նաև, թե որքան հաճախ են դիտորդները դիտարկում Երասխի հատվածում։ Այնուհետեւ Գերմանիայի ԱԳՆ ղեկավարը մեկնել է Արարատի մարզի Ոստան գյուղ՝ հանդիպելու Լեռնային Ղարաբաղից բռնի տեղահանված հայերին։