News - Ադրբեջանը և Պակիստանը զարգացնում են ռազմական համագործակցությունը

Ադրբեջանի պաշտպանության նախարար, գեներալ Զաքիր Հասանովը չորեքշաբթի ընդունել է Պակիստանի բանակի շտաբի պետ Սայիդ Ասիմ Մունիրի գլխավորած պատվիրակությանը, այս մասին APA-ին հայտնել են Ադրբեջանի պաշտպանության նախարարությունից։ Հասանովն ընդգծել է, որ Ադրբեջանի, Պակիստանի և Թուրքիայի միջև երկկողմ և եռակողմ ռազմական համագործակցությունը հիմնված է բարեկամական և եղբայրական հարաբերությունների վրա։ Հանդիպմանը քննարկվել են Ադրբեջանի և Պակիստանի միջև ռազմական, ռազմատեխնիկական, ռազմակրթական և այլ ոլորտներում համագործակցության հարցեր։ Այնուհետև Պակիստանի պատվիրակության հետ հանդիպել է պաշտպանության նախարարի առաջին տեղակալ-Ադրբեջանի բանակի գլխավոր շտաբի պետ Քարիմ Վալիևը։ Գլխավոր շտաբում կայացած հանդիպմանը նշվել է, որ երկու երկրների միջև ռազմական հարաբերությունները և ռազմավարական գործընկերությունը զարգանում են։ Ընդգծվել է նաև երկկողմ և եռակողմ համատեղ զորավարժությունների ինտենսիվության բարձրացման նշանակությունը։ Այնուհետև Ադրբեջանի ռազմաօդային ուժերի շտաբում տեղի է ունեցել հանդիպում պաշտպանության փոխնախարար, ռազմաօդային ուժերի հրամանատար Ռամիզ Թահիրովի հետ։ Տեղի է ունեցել մտքերի հանգամանալից փոխանակում փոխադարձ հետաքրքրություն ներկայացնող մի շարք հարցերի շուրջ։