News - Հայաստանի փոխվարչապետը և Ճապոնիայի դեսպանը քննարկել են երկկողմ առևտրատնտեսական հարաբերությունների զարգացման հնարավորությունները

Կառավարությունից NEWS.am-ին հայտնում են, որ փոխվարչապետ Մհեր Գրիգորյանը հանդիպել է Հայաստանում դիվանագիտական ​​առաքելությունն ավարտող Ճապոնիայի դեսպան Մասանորի Ֆուկուսիմայի հետ։ Զրույցի սկզբում փոխվարչապետն ընդգծել է հայ-ճապոնական բարեկամական հարաբերությունների զարգացման կարևորությունը, շնորհակալություն հայտնել դեսպանին այս ուղղությամբ կատարած աշխատանքի համար և նորանոր հաջողություններ մաղթել հետագա գործունեության մեջ։ ՀՀ փոխվարչապետը նաև Ճապոնիայի դեսպանին ներկայացրել է Լեռնային Ղարաբաղից բռնի տեղահանված ավելի քան 100 հազար հայ փախստականների կարճաժամկետ և միջնաժամկետ կարիքները և շնորհակալություն հայտնել Ճապոնիային այս դժվարին իրավիճակներում Հայաստանին աջակցելու համար։ Զրուցակիցները քննարկել են երկու երկրների միջև առևտրատնտեսական հարաբերությունների զարգացման հնարավորությունները և կարևորել բարձր տեխնոլոգիաների, կրթության և զբոսաշրջության ոլորտում համագործակցության մեծ ներուժի իրացումը։