News - Հայաստանը և Իրանը փոխըմբռնման հուշագիր են ստորագրել համագործակցության ամրապնդման, աշխատուժի փոխանակման վերաբերյալ
Business Strategy
Հայաստանը և Իրանը փոխըմբռնման հուշագիր են ստորագրել համագործակցության ամրապնդման, աշխատուժի փոխանակման վերաբերյալ
Աշխատանքային այցով Իրանում գտնվող ՀՀ աշխատանքի և սոցիալական հարցերի նախարար Նարեկ Մկրտչյանը հանդիպել է Իրանի աշխատանքի, կոոպերատիվների և սոցիալական ապահովության նախարար Սեյյեդ Սոուլաթ Մորթազավիի հետ։ Հայաստանի աշխատանքի և սոցիալական հարցերի նախարարությունից NEWS.am -ին հայտնում են, որ քննարկվել են աշխատանքի և սոցիալական պաշտպանության ոլորտում երկու երկրների միջև համագործակցության ընդլայնման հնարավորությունները, անդրադարձել երկկողմ հետաքրքրություն ներկայացնող մի շարք հարցերի։ Կողմերը նաև ստորագրել են փոխըմբռնման հուշագիր՝ երկու երկրների միջև համագործակցությունն ամրապնդելու և աշխատուժի փոխանակման նպատակով։ Նրանք պարտավորվել են համատեղել ջանքերը զբաղվածության ապահովման, անօրինական միգրացիայի կանխարգելման և Հայաստանի և Իրանի միջև աշխատանքի փոխանակման գործընթացի պարզեցման ուղղությամբ: Պայմանավորվածություն է ձեռք բերվել նաև պարբերաբար տեղեկատվություն փոխանակել երկու երկրներում աշխատատեղերի, ոլորտների, ինչպես նաև պահանջվող մասնագիտական որակավորումների վերաբերյալ։ Նախարար Մկրտչյանը բարձր է գնահատել Հայաստանի և Իրանի միջև երկկողմ բարեկամական հարաբերությունների դերը և վստահություն հայտնել, որ այս համագործակցությունը կշարունակի զարգանալ մոտ ապագայում՝ ելնելով երկու երկրների և ժողովուրդների լավագույն շահերից։ Իր հերթին Մորթազավին նշել է, որ իրենք պատրաստ են հայկական կողմին ներկայացնել իրենց լավագույն փորձը, ներուժը և հնարավորությունները՝ ի շահ իրենց հարևան երկրի սոցիալական պաշտպանության համակարգի զարգացման:
About usyoo
Categories
Tags
