News - Հայաստանի վարչապետը և Լեհաստանի դեսպանն անդրադարձել են Ղարաբաղից բռնի տեղահանվածների հումանիտար իրավիճակին

Վարչապետ Նիկոլ Փաշինյանն ընդունել է Հայաստանում Լեհաստանի նորանշանակ դեսպան Պյոտր Սկվիեցինսկուն։ Այս մասին հայտնում են վարչապետի աշխատակազմից։ Փաշինյանն ընդգծել է հայ-լեհական հարաբերությունների շարունակական զարգացումը ինչպես քաղաքական երկխոսության, այնպես էլ տնտեսության ոլորտում։ Վարչապետը նաև կարևորել է առկա ներուժի իրացումը երկու երկրների միջև առևտրատնտեսական կապերի ընդլայնման գործում։ Բացի այդ, զրուցակիցներն անդրադարձել են ավելի քան 100.000 Լեռնային Ղարաբաղի հայերի բռնի տեղահանմանը և դրա հետևանքով ստեղծված հումանիտար իրավիճակին, որը պայմանավորված է Լեռնային Ղարաբաղում Ադրբեջանի էթնիկ զտումների քաղաքականությամբ։ Դեսպան Սկվիեցինսկին ընդգծել է Լեհաստանի կառավարության շահագրգռվածությունը խորացնելու և ընդլայնելու Հայաստանի հետ համագործակցությունը և հավելել, որ Հայաստանում իր պաշտոնավարման ընթացքում կներդնի բոլոր ջանքերը երկկողմ հարաբերություններն էլ ավելի զարգացնելու համար։ Հանդիպմանը մտքեր են փոխանակվել նաև հայ-լեհական հարաբերությունների, Հայաստան-Եվրամիություն համագործակցության և մի շարք այլ հարցերի շուրջ։