

Ռուսաստանի Դաղստանի մայրաքաղաք Մախաչկալայի օդանավակայանը կրկին բաց է լիարժեք շահագործման համար, հայտնում է Ռուսաստանի օդային տրանսպորտի դաշնային գործակալությունը (Ռոսավիացիա): «Ույթաշ» օդանավակայանը (...) վերսկսել է ինքնաթիռների ընդունումն ու բացթողումը հոկտեմբերի 30-ին՝ Մոսկվայի ժամանակով ժամը 14:00-ից»,- հայտարարել է Ռոսավիացիան։ Այն, սակայն, ավելացրել է, որ Azimuth և Red Wings ավիաընկերությունների թռիչքները Թել Ավիվից Միներալնիե Վոդի և Մախաչկալա ժամանակավորապես կիրականացվեն Ռուսաստանի այլ քաղաքներից։ Կիրակի երեկոյան Մախաչկալայում տեղի բնակիչները ներխուժել են օդանավակայանի թռիչքուղի Թել Ավիվ չվերթի ժամանումից հետո։ Հաղորդվում է, որ նրանք որոնել են Իսրայելի քաղաքացիներին, ինչպես նաև ստուգել են տարածքը լքող մեքենաները, հայտնում է ՌԻԱ Նովոստին։ Դաղստանի ներքին գործերի նախարարությունը հայտարարել է, որ զանգվածային անկարգությունների փաստով քրեական գործ է հարուցվել։ Իսկ Դաղստանի առողջապահության նախարարության տվյալներով՝ Մախաչկալայի օդանավակայանում այս միջադեպի ժամանակ տուժել է ավելի քան 20 մարդ՝ ինչպես իրավապահներ, այնպես էլ քաղաքացիական անձինք. 10-ից ավելի մարդ ստացել է թեթև վնասվածքներ, 10 հոգի տեղափոխվել է հիվանդանոց, նրանցից երկուսի վիճակը ծանր է։