News - Մհեր Գրիգորյանը և ԵՄ դեսպանը մտքեր են փոխանակել տարածաշրջանային զարգացումների շուրջ

Փոխվարչապետ Մհեր Գրիգորյանն ընդունել է Հայաստանում ԵՄ պատվիրակության ղեկավար, դեսպան Վասիլիս Մարագոսին։ Այս մասին հայտնում է կառավարության մամուլի ծառայությունը։ Մհեր Գրիգորյանը ԵՄ դեսպանին ներկայացրել է Լեռնային Ղարաբաղից բռնի տեղահանված ավելի քան 100 հազար փախստականների կարճաժամկետ և միջնաժամկետ կարիքների բավարարմանն ուղղված կառավարության կողմից իրականացվող աշխատանքները։ Հանդիպման ընթացքում քննարկվել են ՀՀ-ԵՄ Համապարփակ և ընդլայնված գործընկերության համաձայնագրի կատարման ընթացքը, ինչպես նաև ԵՄ տնտեսական և ներդրումային պլանի ծրագրերի իրականացման ընթացքը։ Երկուստեք ընդգծվել է այդ գործընթացների լիարժեք իրականացման անհրաժեշտությունը։ Փոխվարչապետը և ԵՄ դեսպանն անդրադարձել են ՀՀ-ԵՄ առևտրատնտեսական հարաբերությունների զարգացման հնարավորություններին։ Հանդիպման ընթացքում մտքեր են փոխանակվել նաև տարածաշրջանային զարգացումների վերաբերյալ։