News - Փաշինյանը՝ Սիյարտոյին. Հայաստան-Հունգարիա երկխոսության շարունակականությունը կարևոր է

Վարչապետից NEWS.am -ին հայտնում են, որ վարչապետ Նիկոլ Փաշինյանն ընդունել է աշխատանքային այցով Հայաստանում գտնվող Հունգարիայի արտաքին գործերի և առևտրի նախարար Պետեր Սիյարտոյի գլխավորած պատվիրակությանը։ Վարչապետը կարևորել է հայ-հունգարական երկխոսության շարունակականությունը և դրա հետևողական զարգացումը տարբեր ուղղություններով։ Փաշինյանն ընդգծել է նաև տնտեսության, կրթության, մշակույթի, ավիացիայի և մի շարք այլ ոլորտներում համագործակցության խթանմանն ուղղված քայլերը։ Իր հերթին Սիյարտոն ընդգծել է Հայաստանի և Հունգարիայի միջև երկկողմ հարաբերություններում արձանագրվող դրական դինամիկան և երկու երկրների միջև բարձր մակարդակի փոխայցելությունների կարևորությունը։ Հունգարիայի արտգործնախարարը հավելել է, որ իր երկրի կառավարությունը նախատեսում է հյուպատոսություն բացել Երևանում, ինչը կնպաստի նաև հայ-հունգարական կապերի ընդլայնմանը։ Նիկոլ Փաշինյանը խոսել է Ադրբեջանի էթնիկ զտումների քաղաքականության հետևանքով Լեռնային Ղարաբաղից Հայաստան ավելի քան 100.000 հայերի բռնի տեղահանման, դրանից բխող մարդասիրական իրավիճակի և դրանից բխող խնդիրների լուծման ուղղությամբ Հայաստանի կառավարության ձեռնարկած գործողությունների մասին։ Հանդիպմանը քննարկվել են նաև Հայաստան-Եվրամիություն հարաբերություններին, ինչպես նաև տարածաշրջանային համագործակցությանը վերաբերող մի շարք հարցեր։