News - Տեղի է ունեցել Հայաստան-ԵՄ համատեղ ռեադմիսիայի կոմիտեի 9-րդ նիստը

Հայաստանի արտաքին գործերի նախարարությունից NEWS.am -ին հայտնում են, որ չորեքշաբթի տեղի է ունեցել Հայաստան-ԵՄ համատեղ ռեադմիսիայի կոմիտեի իններորդ նիստը։ Հանդիպմանը ներկա էին ՀՀ ԱԳՆ և ՆԳՆ, Եվրահանձնաժողովի, Հայաստանում ԵՄ պատվիրակության, ԵՄ անդամ երկրների դեսպանատների, ինչպես նաև FRONTEX-ի ներկայացուցիչներ։ Հանդիպումը համանախագահում էին Հայաստանի միգրացիայի և քաղաքացիության ծառայության ղեկավար Արմեն Ղազարյանը և Եվրոպական հանձնաժողովի Միգրացիայի և ներքին գործերի գլխավոր տնօրինության անկանոն միգրացիայի և վերադարձի բաժնի ղեկավար Սիլվենա Պեստան։ Կողմերը քննարկել են Հայաստան-Եվրամիություն ռեադմիսիայի համաձայնագրի երկկողմ կատարման ընթացքը, ռեադմիսիայի հարցերի վիճակագրությունը, ինչպես նաև համաձայնագրի կատարման արդյունավետության հետագա բարձրացմանն ուղղված այլ տեխնիկական և բովանդակային հարցեր։ Կողմերն անդրադարձան ներկայումս իրականացվող վերաինտեգրման աջակցության պետական ​​ծրագրին և Հայաստանում կամավոր վերադարձի և վերաինտեգրման համակարգի կատարելագործման ուղղությամբ իրականացվող աշխատանքներին։ Եվրոպական կողմն իր հերթին բարձր է գնահատել հայկական կողմի հետ արդյունավետ համագործակցությունը։ Կողմերը պայմանավորվել են շարունակել ակտիվ քայլերը Հայաստան-ԵՄ ռեադմիսիայի համաձայնագրի հետագա իրականացման ուղղությամբ։