News - Կանադայի արտգործնախարարն այցելել է Երևանում գտնվող Հայոց ցեղասպանության հուշահամալիր

Հայոց ցեղասպանության թանգարան-ինստիտուտից NEWS.am-ին հայտնում են, որ պաշտոնական այցով Հայաստան ժամանած Կանադայի արտգործնախարար Մելանի Ջոյի գլխավորած պատվիրակությունը չորեքշաբթի այցելել է Երևանում գտնվող Հայոց ցեղասպանության հուշահամալիր։ Ջոլիին ուղեկցում էին Հայաստանի արտաքին գործերի նախարար Արարատ Միրզոյանը և Հայաստանում Կանադայի առաջին ռեզիդենտ դեսպան Էնդրյու Թերները։ Երկու երկրների արտգործնախարարները ծաղկեպսակներ դրեցին Հայոց ցեղասպանության զոհերի հուշարձանին, ապա հյուրերը ծաղիկներ դրեցին Անմար կրակի մոտ և մեկ րոպե լռությամբ հարգեցին այս ողբերգության անմեղ զոհերի հիշատակը։ Հյուրերը նաև շրջեցին Հիշողության պուրակով, որտեղ Կանադայի արտգործնախարար Ջոլին ջրեց 2018 թվականին Կանադայի վարչապետ Ջասթին Թրյուդոյի տնկած արծաթե եղևնին: