News - Հայաստանի փոխարտգործնախարարը Հունգարիայի պատվիրակությանը ներկայացրել է Ադրբեջանի կողմից էթնիկ զտումների հետևանքով ստեղծված հումանիտար իրավիճակը

ԱԳՆ-ից NEWS.am -ին հայտնում են, որ ՀՀ ԱԳ փոխնախարար Պարույր Հովհաննիսյանն ընդունել է Հունգարիայի վարչապետի աշխատակազմի ղեկավարի տեղակալ Միկլոշ Պանիի և Հունգարիայի օգնության ծրագրի պետքարտուղար Տրիստան Ազբեյի գլխավորած պատվիրակությանը։ Կողմերը քննարկել են երկկողմ օրակարգի հարցերի լայն շրջանակ՝ ընդգծելով փոխադարձ հետաքրքրություն ներկայացնող ոլորտներում հարաբերությունների հետագա զարգացման անհրաժեշտությունը, անդրադարձել Հայաստան-Եվրամիություն գործընկերությանն ու միջազգային կազմակերպությունների շրջանակներում փոխգործակցությանը։ Նաև, ԱԳ փոխնախարար Հովհաննիսյանը հունգարական կողմին ներկայացրեց Ադրբեջանի էթնիկ զտումների քաղաքականության հետևանքով ստեղծված մարդասիրական իրավիճակը, խոսեց Լեռնային Ղարաբաղից բռնի տեղահանված հայ փախստականներին աջակցություն և օգնություն ցուցաբերելու հայկական պետության ջանքերի մասին, այդ թվում՝ միջազգային գործընկերների հետ տարվող աշխատանքները։ Այս համատեքստում Պարույր Հովհաննիսյանը շնորհակալություն է հայտնել Հունգարիային աջակցության համար։