News - Նիկոլ Փաշինյանը և Մայքլ Ռոթը զրուցել են հայ-ադրբեջանական հարաբերությունների կարգավորման գործընթացի շուրջ

Վարչապետ Նիկոլ Փաշինյանն այսօր ընդունել է Գերմանիայի Բունդեսթագի արտաքին հարաբերությունների հանձնաժողովի նախագահ Միխայել Ռոթի գլխավորած պատվիրակությանը։ Վարչապետը ողջունել է պարոն Ռոթի այցը և ընդգծել Հայաստանի և Գերմանիայի խորհրդարանների միջև համագործակցության և երկխոսության շարունակական զարգացումն ու ամրապնդումը։ Հայաստան-Գերմանիա և Հայաստան-Եվրամիություն գործընկերության համատեքստում Նիկոլ Փաշինյանն ընդգծել է մեր երկրում իրականացվող ժողովրդավարական բարեփոխումների արդյունավետ խթանման անհրաժեշտությունը։ Վարչապետն անդրադարձել է տարածաշրջանում տեղի ունեցող գործընթացներին, Ադրբեջանի էթնիկ զտումների քաղաքականության արդյունքում Լեռնային Ղարաբաղից մեր ավելի քան 100.000 հայրենակիցների բռնի տեղահանմանը, դրանից բխող հումանիտար իրավիճակին։ Մայքլ Ռոթը բարձր է գնահատել երկկողմ միջխորհրդարանական կապերը և վստահություն հայտնել դրանց հետագա ամրապնդման հարցում։ Բունդեսթագի արտաքին հարաբերությունների հանձնաժողովի նախագահը դատապարտել է Ադրբեջանի կողմից Լեռնային Ղարաբաղում իրականացվող էթնիկ զտումների քաղաքականությունը և տեղի հայերի բռնի տեղահանումը։ Զրուցակիցները քննարկել են Հայաստան-Ադրբեջան հարաբերությունների կարգավորման գործընթացը, տարածաշրջանում խաղաղությունն ու կայունությունը, Հայաստանում Եվրոպական քաղաքացիական դիտորդական առաքելության գործունեությունը, ինչպես նաև փոխադարձ հետաքրքրություն ներկայացնող այլ հարցեր։