News - Գերմանիայի պատգամավոր Հայաստանի խորհրդարանի նախագահին. Մենք բավարար քայլեր չենք ձեռնարկել Ադրբեջանի ռազմական ագրեսիան կանխելու համար

Հայաստանի Ազգային ժողովի նախագահ Ալեն Սիմոնյանը երկուշաբթի ընդունել է Գերմանիայի խորհրդարանի՝ Բունդեսթագի արտաքին հարաբերությունների հանձնաժողովի նախագահ Միխայել Ռոթի գլխավորած պատվիրակությանը։ ԱԺ-ից NEWS.am -ին հայտնում են, որ գործընկերներն ընդգծել են Հայաստանի և Գերմանիայի միջև երկկողմ բարեկամական հարաբերությունների կայուն զարգացումը և միջխորհրդարանական համագործակցության խորացումը։ Հանդիպմանն անդրադարձ է եղել Լեռնային Ղարաբաղի հայաթափմանը և Ադրբեջանի էթնիկ զտումների քաղաքականության հետևանքով առաջացած խնդիրներին։ Ռոթը նշել է, որ իրենք բավարար քայլեր չեն ձեռնարկել՝ կանխելու ադրբեջանական ռազմական ագրեսիան Լեռնային Ղարաբաղի հայերի դեմ։ Սիմոնյանը ԱԺ-ի և իր անունից շնորհակալություն է հայտնել Գերմանիային սեպտեմբերի 21-ին Լեռնային Ղարաբաղի հիմնախնդրով ՄԱԿ-ի Անվտանգության խորհրդի նիստի ժամանակ Լեռնային Ղարաբաղում Ադրբեջանի կողմից սանձազերծված պատերազմի վերաբերյալ սկզբունքային և հասցեական ուղերձի համար։ Կողմերը քննարկել են Ադրբեջանի դեմ հնարավոր պատժամիջոցների կիրառման անհրաժեշտությունը։ ԱԺ նախագահը վերահաստատեց, որ Հայաստանն ընդունել է խաղաղության օրակարգ և առաջարկում է տարածաշրջանային խաղաղության ճանապարհային քարտեզ։