

Լրագրողների պաշտպանության կոմիտեի (CPJ) տվյալներով՝ առնվազն 22 լրագրող է սպանվել հոկտեմբերի 7-ին Իսրայելի և ՀԱՄԱՍ-ի միջև մարտերի սկսվելուց հետո, հայտնում է AFP-ն։ Ըստ CPJ-ի՝ նրանց թվում են 18 պաղեստինցի, երեք իսրայելցի և մեկ լիբանանցի։ Նրանցից 15-ը զոհվել են իսրայելական ավիահարվածների, իսկ երկուսը` ՀԱՄԱՍ-ի հարձակումների արդյունքում Իսրայելի հարավում: Կոմիտեն ավելացրել է, որ ութ լրագրող վիրավորվել է, երեքը անհետ կորել կամ կալանավորվել են։ «CPJ-ն ընդգծում է, որ լրագրողները քաղաքացիական անձինք են, ովքեր կարևոր աշխատանք են կատարում ճգնաժամի ժամանակ և չպետք է հայտնվեն պատերազմող կողմերի թիրախում», - ասվում է կազմակերպության հայտարարության մեջ: