News - Նիկոլ Փաշինյանը և Դունյա Միյատովիչը քննարկել են ղարաբաղցի հայերի բռնի տեղահանման հետևանքով ստեղծված հումանիտար իրավիճակը.

Վարչապետի աշխատակազմից NEWS.am-ին հայտնում են, որ վարչապետ Նիկոլ Փաշինյանը չորեքշաբթի ընդունել է Եվրոպայի խորհրդի մարդու իրավունքների հանձնակատար Դունյա Միյատովիչին։ Փաշինյանը ողջունել է Միյատովիչի այցը Հայաստան և վստահություն հայտնել, որ այն կնպաստի մարտահրավերներին ու խնդիրներին տեղում ծանոթանալուն։ Զրուցակիցները քննարկել են Ադրբեջանի վարած էթնիկ զտումների քաղաքականության հետևանքով Լեռնային Ղարաբաղից ավելի քան 100.000 հայերի բռնի տեղահանման հետ կապված հումանիտար իրավիճակը և միջազգային հանրության կողմից համապատասխան աջակցության հետագա միջոցառումները։ Դունյա Միյատովիչը նշել է, որ իր նպատակն է գնահատել առկա կարիքները, այդ թվում՝ կապված Լեռնային Ղարաբաղի հայերի իրավունքների ապահովման հետ։ Կողմերը մտքեր են փոխանակել նաև մարդու իրավունքների ոլորտում ՀՀ կառավարության կողմից իրականացվող բարեփոխումների, ինչպես նաև հետագա երկկողմ համագործակցության շուրջ։