News - Մարագոսը վերահաստատում է ԵՄ հանձնառությունը՝ աջակցելու Հայաստանի կառավարության ծրագրերին Ղարաբաղից բռնի տեղահանվածների համար.

ՀՀ ֆինանսների նախարարությունից NEWS.am -ին հայտնում են, որ ֆինանսների նախարար Վահե Հովհաննիսյանն ուրբաթ ընդունել է Հայաստանում Եվրոպական միության (ԵՄ) պատվիրակության նորանշանակ ղեկավար, դեսպան Վասիլիս Մարագոսին։ Ողջունելով Հայաստան-Եվրամիություն համագործակցության ներկա մակարդակը՝ նախարարը պատրաստակամություն հայտնեց միավորել ջանքերը՝ այս համագործակցության հետագա ամրապնդման, ընդլայնման և արդյունավետության բարձրացման ուղղությամբ։ Հանդիպման ընթացքում նախարար Հովհաննիսյանը ներկայացրել է Հայաստանի տնտեսական իրավիճակը, ինչպես նաև Լեռնային Ղարաբաղից բռնի տեղահանված հայերին աջակցելու կարճաժամկետ և միջնաժամկետ ծրագրերն ու խնդիրները։ Դեսպան Մարագոսն իր հերթին վերահաստատել է ԵՄ հանձնառությունը՝ աջակցելու Հայաստանի կառավարության համապատասխան ծրագրերին։ Կողմերը քննարկել են նաև Հայաստան-ԵՄ Համապարփակ և ընդլայնված գործընկերության համաձայնագրի իրականացման արդյունավետության բարձրացման, ԵՄ բյուջետային աջակցության ծրագրերի, ԵՄ տնտեսական և ներդրումային ծրագրի շրջանակներում ապագա համագործակցության և հնարավոր նոր ուղղությունների հետ կապված հարցեր։