News - Ադրբեջանը դժգոհ է Հայաստանի վարչապետի հարցազրույցից

Ադրբեջանը դժգոհ է Հայաստանի Հանրային հեռուստաընկերությանը ՀՀ վարչապետ Նիկոլ Փաշինյանի տված հարցազրույցից։ Ադրբեջանի արտաքին գործերի նախարարությունը, մեկնաբանելով այս հարցազրույցը, հայտարարել է, որ «հայկական կողմը չի հրաժարվել քաղաքական շահարկումներից և խեղաթյուրված մեկնաբանություններից»։ Հարցազրույցում Փաշինյանը նշել է, որ Ադրբեջանը բարձրացնում է ութ գյուղի հարցը, հավելելով, որ Հայաստանն էլ ունի ութ գյուղի խնդիր։ «(…) Նույն Տավուշի մարզում, օրինակ, մենք ունենք Ադրբեջանի կողմից օկուպացված տարածքներ՝ Բերքաբեր, Այգեհովիտ, Վազաշեն, Պառավաքար գյուղերը, ինչպես նաև այլ տարածքներ։ Այդ հարցի լուծումն առաջարկել ենք դեռ 2021թ. , և մենք ասացինք. «Եկեք որոշենք, թե որն է սահմանազատման քարտեզը և միաժամանակ զորքերը դուրս բերենք սահմանային գծից»։ Բաքուն «ամբողջովին սուտ» է անվանել Փաշինյանի այն հայտարարությունը, թե Ադրբեջանը օկուպացրել է հայկական որոշ գյուղեր։ «Հայաստանի կողմից Ադրբեջանի 8 գյուղերը օկուպացիայի տակ պահելն արդարացնելու համար, թե Ադրբեջանը իբր օկուպացրել է հայկական որոշ գյուղերի տարածքները, լիովին սուտ է։ Հայաստանը օկուպացրել է Ադրբեջանի 8 գյուղ»,- ասված է Ադրբեջանի ԱԳՆ հայտարարության մեջ։ Ինչ վերաբերում է Հայաստան-Ադրբեջան սահմանի սահմանազատմանը, Փաշինյանը խոսեց 1975 թվականի քարտեզները հիմք ընդունելու մասին։ Ադրբեջանի ԱԳՆ-ն, սակայն, պնդում է, որ 1975 թվականի քարտեզը, որին վկայակոչում է Հայաստանը, «չկա»։ «Ընդհանուր առմամբ, պրակտիկայի համաձայն, սահմանազատման գործընթացն իրականացվում է ոչ միայն քարտեզների հիման վրա, միևնույն ժամանակ, որպեսզի այդ քարտեզները հղման աղբյուր լինեն, այդ քարտեզները պետք է հիմնված լինեն միջազգային իրավական փաստաթղթերի վրա, Թեև Հայաստանը դեռևս չի սահմանազատել իր սահմանները հարևաններից որևէ մեկի հետ իր տարածքային պահանջների պատճառով, Հայաստանի պնդումը, որ սահմանազատումը պետք է լինի միայն մեկ քարտեզի հիման վրա, իմաստ չունի. », - ասված է Ադրբեջանի ԱԳՆ հայտարարության մեջ։