News - Նիկոլ Փաշինյանը և Լուի Բոնոն քննարկել են հայ-ադրբեջանական հարաբերությունների կարգավորման գործընթացը

ՀՀ վարչապետ Նիկոլ Փաշինյանը չորեքշաբթի ընդունել է ԱՄՆ Պետդեպարտամենտի կովկասյան բանակցությունների գծով ավագ խորհրդական և ԵԱՀԿ Մինսկի խմբի ամերիկացի համանախագահ Լուի Բոնոյին։ Վարչապետի աշխատակազմից NEWS.am-ին հայտնում են, որ զրուցակիցներն անդրադարձել են Հայաստան-Ադրբեջան հարաբերությունների կարգավորման գործընթացին և ընդգծել դրա շարունակականությունը։ Մտքեր փոխանակվեցին նաև օրերս Իսպանիայի Գրանադա քաղաքում կայացած Հայաստանի վարչապետի, Ֆրանսիայի նախագահի, Գերմանիայի կանցլերի և Եվրոպական խորհրդի նախագահի քառակողմ հանդիպման վերաբերյալ։ Բացի այդ, Փաշինյանը և Բոնոն քննարկել են ադրբեջանական էթնիկ զտումների քաղաքականության հետևանքով Լեռնային Ղարաբաղից ավելի քան 100.000 հայերի բռնի տեղահանման հետևանքով ստեղծված հումանիտար իրավիճակը և համապատասխան մարտահրավերներին դիմակայելու միջոցառումները։ Անդրադարձ է եղել նաև հայ-ամերիկյան հարաբերություններին առնչվող թեմաներին։