News - Պաշտոնական. Ղարաբաղցի որոշ հիվանդներ բուժում կստանան Իսպանիայում

Լեռնային Ղարաբաղից բռնի տեղահանված որոշ հիվանդներ բուժում կստանան նաև Իսպանիայում, երեքշաբթի Մարդասիրական կենտրոնում հրավիրված ասուլիսի ժամանակ ասաց առողջապահության փոխնախարար Արտակ Ջումայանը։ «Գործընթացը շարունակվում է, այսօր արդեն կունենանք հիվանդներ, ովքեր բուժումը կշարունակեն Իսպանիայում, մեր հիվանդանոցներում ընդգրկված են նաև տարբեր երկրների բուժաշխատողներ»,- ասաց նա։ Արտակ Ջումայանը նշեց, որ մի քանի հիվանդ արդեն բուժում են ստանում ԱՄՆ-ում, Ֆրանսիայում, Իտալիայում, Բելգիայում և Բուլղարիայում՝ առողջապահության նախարարության համակարգմամբ։ Նա ասաց, որ Լեռնային Ղարաբաղից բռնի տեղահանվածներից 264-ը շարունակում են բուժում ստանալ հայկական տարբեր բուժհաստատություններում։ 97 պացիենտի վիճակը գնահատվում է ծանր, 12-ը՝ ծայրահեղ ծանր։ Նրա խոսքով, Առողջապահության նախարարության առաջնային բուժօգնության ստորաբաժանումներում հաշվառված է Լեռնային Ղարաբաղից 18786 հարկադիր տեղահանված անձ, այդ թվում՝ 5600 երեխա և ավելի քան 250 հղի։