News - Այն, ինչ պատահեց Ղարաբաղի ժողովրդին, էթնիկ զտումն էր.

Հայաստանի արտաքին գործերի նախարար Արարատ Միրզոյանն ընդունել է ԵՄ ճգնաժամային կառավարման հանձնակատար Յանեշ Լենարչիչին։ Ըստ նախարարության մամուլի հաղորդագրության, Արարատ Միրզոյանը ներկայացրել է Լաչինի միջանցքի ամիսներ շարունակ շրջափակման և սեպտեմբերի 19-ին Լեռնային Ղարաբաղի խաղաղ բնակչության դեմ Ադրբեջանի կողմից իրականացված ռազմական ագրեսիայի պատճառով ստեղծված իրավիճակը։ Ընդգծելով, որ Լեռնային Ղարաբաղում տեղի ունեցածն իրականում էթնիկ զտում էր, որի վտանգի մասին Հայաստանը զգուշացնում էր ամիսներ շարունակ՝ նախարար Միրզոյանն ընդգծեց տարածաշրջանում ուժի կիրառման շարունակական վտանգը բացառելու անհրաժեշտությունը։ Կողմերն անդրադարձել են նաև Լեռնային Ղարաբաղից բռնի տեղահանվածներին պատշաճ աջակցության տրամադրմանը և այդ նպատակով միջազգային գործընկերների հետ տարվող աշխատանքներին։ ՀՀ ԱԳ նախարարը և ԵՄ հանձնակատարը մտքեր են փոխանակել տարածաշրջանում անվտանգության իրավիճակի, ինչպես նաև ՀՀ-ԵՄ գործընկերության օրակարգի հարցերի շուրջ։