News - ԱՄՆ Կոնգրեսի անդամները նամակով դիմել են Բլինքեն Փաուերին՝ կոչ անելով անհապաղ կանխել Ադրբեջանի ներխուժումը Հայաստան

Կոնգրեսի հայկական հանձնախմբի համանախագահ Ֆրենկ Փալոնին (D-NJ), ներկայացուցիչներ Ջիմ Կոստան (D-CA) և Բրեդ Շերմանին (D-CA) միացել են ԱՄՆ Ներկայացուցիչների պալատի օրենսդիրներից կազմված երկկուսակցական խմբին` կոչ անելով Բայդենի վարչակազմին անհապաղ ձեռնարկել միջոցառումներ՝ կանխելու ադրբեջանական ներխուժումը Հայաստան, հայտնում է Ամերիկայի Հայ դատի հանձնախումբը։ «Ադրբեջանական ուժերի հետագա ագրեսիան և համակողմանի պատերազմը Հարավային Կովկասում կանխելու հնարավորությունը սպառվում է», - ասվում է ԱՄՆ ներկայացուցիչների հոկտեմբերի 4-ի նամակում` ուղղված պետքարտուղար Էնթոնի Բլինքենին և USAID-ի ադմինիստրատոր Սամանթա Փաուերին: «Ալիևի ազդանշանները ցույց են տալիս, որ նրա էթնիկ զտումների արշավը չի դադարեցվի Արցախի [(Լեռնային Ղարաբաղի)] վրա իր ռազմական հարձակումներով»։ Ամերիկացի օրենսդիրներն առաջարկել են չորս կոնկրետ ուղիներ, որոնցով ԱՄՆ-ը կարող է զսպել Ադրբեջանի ագրեսիան, այդ թվում. — Ադրբեջանի դեմ գլոբալ Մագնիտսկու ակտի և այլ պատժամիջոցների սահմանում «Արցախի վրա ռազմական հարձակման և լուծարման գործում նրանց դերի և դրա հետ կապված վայրագությունների և մարդու իրավունքների խախտումների համար» — ԱԶԱՏՈՒԹՅԱՆ ԱՋԱԿՑՈՒԹՅԱՆ ԱԿՏԻ 907-րդ հոդվածի կիրարկում՝ դադարեցնելով ռազմական օգնությունը Ադրբեջանին — Հայաստանին անվտանգության աջակցության տրամադրում — Միջազգային դիտորդների և խաղաղապահների տեղակայում Հայաստանում՝ ադրբեջանական ներխուժումը կանխելու համար։ Նաև օրենսդիրը կոչ է արել ընդլայնել ԱՄՆ և միջազգային մարդասիրական օգնությունը Արցախից բռնագաղթված հայ փախստականներին և ջանքեր գործադրել՝ ապահովելու «Արցախի գերեվարված պետական ​​պաշտոնյաների և հայ ռազմագերիների անվերապահ ազատ արձակումն ու համաներումը»։