News - Հիքմեթ Հաջիև. Ադրբեջանը պահանջներ չունի Հայաստանից, կան պահանջներ Ֆրանսիայից

Ադրբեջանի որոշումը՝ չմասնակցել Հայաստանի վարչապետ Նիկոլ Փաշինյանի հետ Իսպանիայի Գրանադայում կայանալիք հնգակողմ հանդիպմանը՝ Եվրամիության, Ֆրանսիայի և Գերմանիայի ղեկավարների մասնակցությամբ, չի նշանակում, որ Բաքուն հրաժարվում է Երևանի հետ բանակցություններից։ Այս մասին սոցցանցերում գրել է Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիեւը, հաղորդում են ադրբեջանական լրատվամիջոցները։ Նրա խոսքով, վերոնշյալ հանդիպմանը չմասնակցելու Ադրբեջանի որոշումը պայմանավորված է «Ֆրանսիայի կողմնակալ գործողությունների և ռազմականացման քաղաքականության պատճառով, որոնք լրջորեն խաթարում են տարածաշրջանային խաղաղությունն ու կայունությունը Հարավային Կովկասում և վտանգի տակ են դնում Եվրամիության ընդհանուր քաղաքականությունը տարածաշրջանի նկատմամբ»։ Հաջիևը նաև նշում է, որ անկախ Ադրբեջանի պնդումներից, համաձայնություն ձեռք չի բերվել Թուրքիայի՝ որպես տարածաշրջանային երկրի մասնակցության վերաբերյալ այս հանդիպմանը։ «Որոշ միջազգային մեդիա ռեսուրսներում ճիշտ չէ դա ներկայացնել որպես Ադրբեջանի հրաժարում Հայաստանի հետ բանակցություններից»,- հավելել է նա՝ ընդգծելով, որ Ադրբեջանն աջակցել է Իսպանիայի՝ որպես ընդունող կողմ, այս ձևաչափին մասնակցելուն։