News - Մակրոն. Ադրբեջանի դեմ պատժամիջոցներն այս փուլում հակաարդյունավետ կլինեն

Ադրբեջանի դեմ պատժամիջոցներն այս փուլում հակաարդյունավետ կլինեն, հայտարարել է Ֆրանսիայի նախագահ Էմանուել Մակրոնը։ Նա դատապարտել է Ադրբեջանին Լեռնային Ղարաբաղում ռազմական գործողություններ իրականացնելու համար՝ պնդելով, որ Ֆրանսիայի կառավարության դիրքորոշումը ճիշտ է, նույնիսկ եթե Բաքուն այն համարում է կողմնակալ՝ հօգուտ Հայաստանի։ «Ֆրանսիան Ադրբեջանի հետ խնդիրներ չունի, բայց Ադրբեջանը, կարծես թե, խնդիրներ ունի միջազգային իրավունքի հետ»,- ասել է Մակրոնը՝ հավելելով, որ Ադրբեջանի դեմ պատժամիջոցներն այս փուլում հակաարդյունավետ կլինեն։ Նրա խոսքով, դեռ չի եկել ժամանակը, որ Եվրոպան պատժամիջոցներ կիրառի Ադրբեջանի դեմ։ «Դրանք հակաարդյունավետ կլինեն և թույլ չեն տա լավագույնս պաշտպանել հայկական տարածքն ու նրա բնակիչներին»,- արդարացրել է Մակրոնն իր կարծիքը։ Նրա խոսքով, ինքը «խորապես ափսոսում է», որ Ադրբեջանի նախագահ Իլհամ Ալիեւը բաց է թողել բանակցություններին մասնակցելու եւ Հայաստանի վարչապետ Նիկոլ Փաշինյանի հետ հանդիպելու հնարավորությունը։ Չնայած դրան, Մակրոնը վստահեցրել է, որ «Եվրոպան շարունակում է իր ջանքերը՝ Ալիևին բանակցային սեղանի շուրջ բերելու համար», Մակրոնը մեջբերում է AFP-ն։