News - ՅՈՒՆԵՍԿՕ-ն շտապ առաքելություն կուղարկի Հայաստան՝ օգնելու Ղարաբաղից փախստականների ընդունմանը

Հայաստանի խնդրանքով ՅՈՒՆԵՍԿՕ-ն առաջիկա օրերին շտապ առաքելություն կուղարկի Հայաստան՝ աջակցելու Արցախից (Լեռնային Ղարաբաղ) փախստականների ընդունմանը։ Այս առաքելությունը կուղարկվի կրթության շարունակականությունն ապահովելու և հոգեսոցիալական աջակցություն ցուցաբերելու համար, նշել է ՅՈՒՆԵՍԿՕ-ն։ Անցած մի քանի օրվա ընթացքում ավելի քան 100 հազար մարդ լքել է Արցախը և փախել Հայաստան։ Իսկ նրանց մոտ մեկ երրորդը երեխաներ և դեռահասներ են։ Երկուշաբթի օրը Հայաստանը պաշտոնապես դիմել է ՅՈՒՆԵՍԿՕ-ին` խնդրելով աջակցություն ընդունելու և օգնություն տրամադրելու բնակչության այս խմբերին` կրթության ոլորտում կազմակերպության մանդատի շրջանակներում: Եվ ՅՈՒՆԵՍԿՕ-ի գլխավոր տնօրեն Օդրի Ազուլեյն արագ արձագանքեց այս խնդրանքին։ Առաջիկա օրերին ՅՈՒՆԵՍԿՕ-ն փորձագետների խումբ կուղարկի Հայաստանի մայրաքաղաք Երևան՝ երկրի իշխանությունների հետ համատեղ աշխատելու՝ ապահովելու տեղահանված ուսանողների կրթության շարունակականությունը։ Գործողությունների այս ծրագիրն ուղղված է լինելու ուսման համար պատշաճ պայմանների ապահովմանը, ուսուցման որակի բարձրացմանն ուղղված ծրագրերին հասանելիությանը, ինչպես նաև հոգեսոցիալական աջակցությանը դժվար իրավիճակներից դուրս գալու համար, որոնցում հայտնվել են ուսանողները: Նաև առաջիկա օրերին ՅՈՒՆԵՍԿՕ-ն նախատեսում է հանդիպում կազմակերպել միջազգային գործընկերների և դոնորների մասնակցությամբ՝ ապահովելու նրանց աջակցությունը, այդ թվում՝ ֆինանսական՝ կրթական նախաձեռնությունների իրականացման համար։