News - Ֆրանսիայի արտգործնախարարը ժամանում է Երևան

Ֆրանսիայի արտաքին գործերի նախարար Քեթրին Կոլոննան ժամանել է Հայաստանի մայրաքաղաք Երևան։ Նա իր X էջում տեղադրել է Արարատ լեռան լուսանկարը և գրել. «Առաջին այցելությունիցս 5 ամիս անց վերադառնում եմ Հայաստան. Բարեկամություն, աջակցություն և համերաշխություն»։ Ֆրանսիացի նախարարը հայտնել էր, որ Հայաստան է մեկնում Ուկրաինայից։ Ավելի վաղ Ֆրանսիայի խորհրդարանում հարցուպատասխանի ժամանակ Կոլոննան հայտարարել էր, որ Ֆրանսիան ամրապնդում է համագործակցությունը Հայաստանի հետ պաշտպանության ոլորտում։ «Երևանում կունենանք ռազմական կցորդ, շուտով հյուպատոսություն կբացենք նաև Սյունիքի մարզում՝ սահմանամերձ գոտում»,- ասել էր Քեթրին Կոլոնան։ Նախատեսվում է, որ նա կհանդիպի Հայաստանի վարչապետ Նիկոլ Փաշինյանի և արտգործնախարար Արարատ Միրզոյանի հետ նաև Լեռնային Ղարաբաղից բռնի տեղահանվածների հետ։