News - Հայաստանի վարչապետն ընդունել է Կիպրոսի խորհրդարանի պատվիրակությանը

Վարչապետ Նիկոլ Փաշինյանն այսօր ընդունել է Կիպրոսի Ներկայացուցիչների պալատի Կիպրոս-Հայաստան համագործակցության միջխորհրդարանական հանձնաժողովի նախագահ Հարիս Ջորջիադեսի գլխավորած պատվիրակությանը։ Վարչապետը ողջունել է Կիպրոսի խորհրդարանական այս պատվիրակության այցը Հայաստան և բարձր է գնահատել երկու երկրների միջև խորհրդարանական համագործակցության և քաղաքական երկխոսության մակարդակը։ Փաշինյանն ընդգծել է Կիպրոսի Ներկայացուցիչների պալատի ընդունած բանաձեւը՝ Ադրբեջանի կողմից Լաչինի միջանցքի անօրինական արգելափակման վերաբերյալ, շնորհակալություն հայտնել հստակ գնահատականների համար։ ՀՀ վարչապետը նաև ընդգծել է Հայաստանի և Կիպրոսի միջև տնտեսական համագործակցության ընդլայնմանն ուղղված միջոցառումների իրականացումը և նշել, որ համագործակցության մեծ ներուժ կա նաև այդ ոլորտում։ Իր հերթին Ջորջադեսը դատապարտել է Ադրբեջանի կողմից Լեռնային Ղարաբաղի հայերի նկատմամբ էթնիկ զտումների քաղաքականության իրականացումը և ընդգծել միջազգային հանրության մարդասիրական օգնությունը Լեռնային Ղարաբաղի բռնի տեղահանված բնակչությանը։ Կիպրոս-Հայաստան համագործակցության միջխորհրդարանական հանձնաժողովի նախագահը նաև ընդգծել է Կիպրոսի աջակցությունը Հայաստանի ինքնիշխանության և տարածքային ամբողջականության պաշտպանությանը։ Հանդիպման ընթացքում քննարկվել են նաև տարածաշրջանում տեղի ունեցող գործընթացները։