News - ԵԱՀԿ ԽՎ ղեկավարը Հայաստանի խորհրդարանի խոսնակի մոտ.

ՀՀ ԱԺ նախագահ Ալեն Սիմոնյանը հինգշաբթի Դուբլինում հանդիպել է Եվրոպայում անվտանգության և համագործակցության կազմակերպության խորհրդարանական վեհաժողովի (ԵԱՀԿ ԽՎ) նախագահ Պիա Կաումայի հետ։ NEWS.am. ՀՀ ԱԺ նախագահը համոզմունք հայտնեց, որ ԵԱՀԿ ԽՎ նորընտիր նախագահը կխրախուսի բոլոր անդամ երկրների միջև երկխոսությունն ու համագործակցությանն ուղղված քայլերը։ Ալեն Սիմոնյանը ողջունել է ԵԱՀԿ ԽՎ աշնանային նստաշրջանը Երեւանում անցկացնելու որոշումը՝ ընդգծելով, որ Հայաստանի կառավարությունն ու Ազգային ժողովը պատրաստվում են նոյեմբերին հյուրընկալել բոլոր գործընկերներին Հայաստանում։ Անդրադառնալով Լեռնային Ղարաբաղի հայերի դեմ ադրբեջանական հարձակման մանրամասներին և դրա հետևանքներին՝ Ալեն Սիմոնյանը ներկայացրել է բռնի տեղահանվածների խնդիրներն ու իրավիճակի բարդությունը։ Գործընկերոջ խնդրանքով նա անդրադարձավ նաև գործողությունների ծրագրին, որով Հայաստանը սկսել է ընդունել Լեռնային Ղարաբաղից տեղահանված մեր հայրենակիցներին։ Կողմերը քննարկել են Հայաստանի տարածքային ամբողջականության և ինքնիշխանության դեմ Ադրբեջանի հերթական ագրեսիան՝ անընդունելի համարելով պաշտոնական Բաքվի անթաքույց նկրտումները։ ՀՀ ԱԺ նախագահը նշեց, որ Հայաստանում ակնկալում են, որ ԵԱՀԿ ԽՎ-ն, որպես ժողովրդավարական արժեքների պաշտպան և հակամարտությունների խաղաղ կարգավորման կողմնակից կառույց, կարտահայտի իր դիրքորոշումը մեր երկրի դեմ գործողությունների վերաբերյալ։ ՀՀ ԱԺ նախագահը նշեց, որ Հայաստանում իրականացվող ժողովրդավարական բարեփոխումներն անշրջելի են, իսկ ժողովրդավարությունը մեր երկրի առաջնային օրակարգն է։ Կողմերը քննարկել են նաև տարածաշրջանում տիրող իրավիճակը՝ կարևորելով հակամարտությունները և դրանց անմիջական ազդեցությունը Հայաստանի վրա։ ԵԱՀԿ ԽՎ նախագահը նշել է, որ իրենք ամեն օր հետևում են զարգացումներին՝ հետաքրքրվելով Հայաստանի տարածքային ամբողջականության դեմ ադրբեջանական սպառնալիքների մասին։ Նա նշեց, որ առաջիկայում նախատեսվում է ԵԱՀԿ ԽՎ արտահերթ նիստ, որին ակնկալվում է Հայաստանի, Վրաստանի և Ադրբեջանի պատվիրակությունների ղեկավարների մասնակցությունը. քննարկվելու են տարածաշրջանում խաղաղության հաստատման հեռանկարները։