News - ՄԱԿ-ը պատրաստ է աջակցել Ղարաբաղի բնակչությանը օգնություն ցուցաբերելուն

ՄԱԿ-ը պատրաստ է աջակցել Լեռնային Ղարաբաղում տիրող իրավիճակից տուժած մարդկանց օգնությանը։ Այս մասին երեքշաբթի հայտարարել է Ժնևում ՄԱԿ-ի տեղեկատվական ծառայության տնօրեն Ալեսանդրա Վելուչին, փոխանցում է «ՌԻԱ Նովոստին»։ ՄԱԿ-ը շատ ուշադիր հետևում է Լեռնային Ղարաբաղից մարդկանց զանգվածային մեկնմանը Հայաստան և շատ մտահոգված է տեղի ունեցող իրադարձություններով, Ժնևում լրագրողների հետ ճեպազրույցի ժամանակ ասաց Վելուչին։ Նա հավելեց, որ իրենք պատրաստ են գնահատել հումանիտար կարիքները, օգնություն ցուցաբերել տուժած մարդկանց և աջակցել օգնության ջանքերին: Իր հերթին, ՄԱԿ-ի փախստականների հարցերով գերագույն հանձնակատարի գրասենյակի խոսնակ Շաբիա Մանթուն կոչ է արել բոլոր կողմերին զերծ մնալ այնպիսի գործողություններից, որոնք կարող են ստիպել Լեռնային Ղարաբաղի խաղաղ բնակչությանը լքել իրենց տները և ապահովել բնակիչների անվտանգությունը: