News - Ֆրանսիան բժշկական սարքավորումներ կուղարկի Ստեփանակերտի պայթյունից տուժածներին և 7 մլն եվրո՝ ղարաբաղցի տեղահանվածների համար.

Ֆրանսիան Հայաստան կուղարկի բժշկական սարքավորումներ՝ Ստեփանակերտում բենզինի պայթյունից տուժածներին առաջին բուժօգնություն ցուցաբերելու և 7 մլն եվրո կտրամադրի Լեռնային Ղարաբաղից բռնի տեղահանվածների սոցիալական կարիքները հաղթահարելու համար։ ՀՀ աշխատանքի և սոցիալական հարցերի նախարար Նարեկ Մկրտչյանի հետ հանդիպմանը Ֆրանսիայի դեսպան Օլիվիե Դեկոտինյեն նույնպես ընդգծեց հումանիտար ճգնաժամի հաղթահարման կարևորությունը։ Նախարար Նարեկ Մկրտչյանը, անդրադառնալով Լեռնային Ղարաբաղից բռնի տեղահանվածներին աջակցելու ուղղությամբ տարվող աշխատանքներին, ներկայացրել է աշխատանքի և սոցիալական հարցերի նախարարության կողմից իրականացվող քայլերը։ Նա նաև բարձր է գնահատել Ֆրանսիայի դերը դժվարին իրավիճակներում Հայաստանի կողքին լինելու և անհրաժեշտ օգնություն ցուցաբերելու համար։ Հանդիպման ավարտին նրանք պատրաստակամություն են հայտնել շարունակել ակտիվ համագործակցությունը սոցիալական պաշտպանության ոլորտում առկա խնդիրների կարգավորման ուղղությամբ։