News - Ղարաբաղում բենզինի պահեստի պայթյունից տուժածներին տեղափոխել են Երևանի այրվածքների կենտրոն (ֆոտո)

Արցախում (Լեռնային Ղարաբաղ) բենզինի պահեստի պայթյունից տուժածները Սիսիանից տեղափոխվել են Երևանի Այրվածքների ազգային կենտրոն։ Այս պահին վերոնշյալ կենտրոն է ժամանել շտապօգնության վեց մեքենա, իսկ տուժածները տեղափոխվում են հիվանդանոց։ Այս բժշկական կենտրոնում գտնվողները սպասում են շտապօգնության մյուս մեքենաների ժամանմանը։ Կենտրոնի մոտ հավաքվածներից շատերը չգիտեն, թե արդյոք իրենց հարազատներն են բերվել այնտեղ, քանի որ նրանց հետ կապ հաստատել չի հաջողվել։ Նրանք սպասում են բժիշկների պարզաբանմանը։ Երեքշաբթի առավոտյան բժիշկների խումբը Հայաստանից ուղղաթիռով մեկնել է Արցախի մայրաքաղաք Ստեփանակերտ՝ անհրաժեշտ դեղորայքով և բժշկական պարագաներով, որպեսզի օգնի անցած երեկոյան Ստեփանակերտ-Ասկերան ավտոճանապարհին հարակից բենզինի պահեստում տեղի ունեցած պայթյունից տուժածներին։ Ժամը 11:30-ի սահմաններում առաջին ուղղաթիռը վայրէջք է կատարել Սիսիանում, որտեղից տուժածներին շտապօգնության մեքենայով տեղափոխել են Երևան։