News - Հայաստանի վարչապետը և Իրանի դեսպանը քննարկել են Ղարաբաղում հումանիտար իրավիճակը

Վարչապետ Նիկոլ Փաշինյանը երկուշաբթի ընդունել է Հայաստանում Իրանի նորանշանակ դեսպան Մեհդի Սոբհանիին։ Այս մասին NEWS.am-ին հայտնում են վարչապետի աշխատակազմից։ Վարչապետը նախ շնորհավորել է դեսպանին նոր պաշտոնում նշանակվելու կապակցությամբ և հույս հայտնել, որ նրա պաշտոնավարման ընթացքում Հայաստան-Իրան հարաբերությունները կշարունակեն զարգանալ և ամրապնդվել։ Փաշինյանն ընդգծել է, որ երկու երկրները պետք է ակտիվ հաղորդակցություն պահպանեն տարածաշրջանի դժվարին ժամանակահատվածում։ Հայաստանի վարչապետն ընդգծել է, որ Իրանի նախագահ Էբրահիմ Ռաիսիի հետ կա հուսալի երկխոսություն, ինչը նպաստում է հայ-իրանական փոխգործակցության հետևողական խորացմանը։ Դեսպան Սոբհանին իր հերթին ընդգծել է Իրանի կառավարության շահագրգռվածությունը՝ զարգացնելու Հայաստանի հետ հարաբերությունները բոլոր ոլորտներում։ Դիվանագետը ևս մեկ անգամ մատնանշեց իրանական կողմի հստակ դիրքորոշումը Հայաստանի տարածքային ամբողջականությանն աջակցելու հարցում։ Սոբհանին իր մտահոգություններն է հայտնել Լեռնային Ղարաբաղում հումանիտար իրավիճակի վերաբերյալ և ընդգծել Լեռնային Ղարաբաղի հայերի անվտանգության և իրավունքների պաշտպանության կարևորությունը։ Զրուցակիցներն անդրադարձել են նաև հայ-իրանական հարաբերությունների օրակարգային մի շարք հարցերի։ Մասնավորապես, քննարկվել են տնտեսության, առևտրատնտեսական հարաբերությունների, ենթակառուցվածքների զարգացման, առողջապահության, կրթության, գիտության, մշակույթի և մի շարք այլ ոլորտներում համատեղ ծրագրերի իրականացումը։