News - Բայդենի նամակը Փաշինյանին. Մենք շարունակելու ենք ամրապնդել մեր համագործակցությունը էներգետիկ դիվերսիֆիկացիայի և անվտանգության ոլորտում

ԱՄՆ Միջազգային զարգացման գործակալության ղեկավար Սամանթա Փաուերը վարչապետ Նիկոլ Փաշինյանին է հանձնել ԱՄՆ նախագահ Ջո Բայդենի նամակը։ Նամակը ներկայացնում ենք ստորև. «Հարգելի պարոն վարչապետ, Իմ լավագույն մաղթանքներն եմ հղում ձեզ և Հայաստանի ժողովրդին, երբ դուք նշում եք ձեր Անկախության օրը: Այս տարի, երբ նշում ենք այս հպարտ առիթը, մենք սգում ենք նաև Լեռնային Ղարաբաղում վերջերս զոհված էթնիկ հայերի կյանքը: Ես խնդրել եմ Սամանտա Փաուերին՝ իմ կաբինետի առանցքային անդամին, անձամբ փոխանցել ձեզ Միացյալ Նահանգների և իմ վարչակազմի ուժեղ աջակցությունը Հայաստանի՝ արժանապատիվ և կայուն տարածաշրջանային խաղաղության ձգտման համար, որը կպահպանի ձեր ինքնիշխանությունը, անկախությունը, տարածքային ամբողջականությունը և ժողովրդավարությունը: . Հայաստանը ցույց է տվել իր հավատարմությունն այդ նպատակին՝ ներգրավվելով Ադրբեջանի հետ խաղաղ բանակցություններում, ինչպես նաև իրականացնելով կարևոր տնտեսական բարեփոխումներ, բարելավելով կառավարության հաշվետվողականությունը և ամրապնդելով ժողովրդավարական ինստիտուտները: Վստահեցնում եմ ձեզ, որ Միացյալ Նահանգները կշարունակի կանգնել Հայաստանի կողքին, երբ դուք աշխատում եք ներքին ժողովրդավարության ամրապնդման և ձեր հարևանության կայունության համար: Միացյալ Նահանգները հանձնառու է աշխատել ձեր կառավարության հետ և լուծել վերջին բռնություններից բխող մարդասիրական կարիքները, որոնք Ադմինիստրատոր Փաուերը մանրամասն կքննարկի ձեզ հետ: Մենք կշարունակենք նաև ամրապնդել մեր համագործակցությունը էներգետիկ դիվերսիֆիկացման, ճկունության, և անվտանգության ոլորտում, ինչպես ցույց տվեցին մեր վերջին ռազմական զորավարժությունները: Հայաստանի հարուստ պատմությունը ոգեշնչել է ամենուրեք ազգերին և մարդկանց՝ ձգտելու հանուն ազատության և արդարության։ Իսկ ամերիկահայ համայնքը շարունակում է ուժի աղբյուր մնալ իմ սեփական երկրում: Առաջիկա տարում ես հույս ունեմ, որ կշարունակեմ էլ ավելի խորացնել և ամրապնդել մեր ազգերի և մեր ժողովրդի միջև կապերը»: