News - Փաշինյանը հանդիպել է ամերիկացի սենատոր Գարի Փիթերսի հետ, քննարկել Ղարաբաղում հումանիտար իրավիճակը

Հայաստանի վարչապետ Նիկոլ Փաշինյանը երկուշաբթի օրը Երևանում հանդիպել է ԱՄՆ սենատոր Գարի Փիթերսի հետ և քննարկել Լեռնային Ղարաբաղում հումանիտար իրավիճակը, այնտեղ բնակվող հայերի անվտանգությունն ու իրավունքների պաշտպանությունը։ Վարչապետի աշխատակազմից NEWS.am-ին հայտնում են, որ Նիկոլ Փաշինյանը բարձր է գնահատել պարոն Փիթերսի այցը հայ ժողովրդի համար ծանր կացության մեջ գտնվող Հայաստան և ընդգծել առկա խնդիրների հաղթահարման գործում ԱՄՆ աջակցության կարևորությունը։ Նիկոլ Փաշինյանն ընդգծել է ԱՄՆ-ի հետ առկա սերտ համագործակցությունը, այդ թվում՝ մեր երկրում ժողովրդավարության ամրապնդումը, բարեփոխումների արդյունավետ իրականացումը և այլ ուղղություններ։ Սենատոր Փիթերսը մտահոգություն է հայտնել Լեռնային Ղարաբաղում տիրող հումանիտար ծանր իրավիճակի կապակցությամբ և ընդգծել մարդասիրական օգնության անհրաժեշտությունը սննդամթերքի, դեղորայքի և այլ անհրաժեշտ պարագաների մատակարարման համար։ Նա նաև կիսվել է Սյունիքի և Վայոց ձորի մարզ կատարած այցելություններից ստացած տպավորություններով, վերահաստատել ԱՄՆ աջակցությունը Հայաստանի տարածքային ամբողջականությանը։