News - Եվրոպացի քաղաքական գործիչները շարունակում են կոչ անել պատժամիջոցներ կիրառել Ադրբեջանի նկատմամբ, այլ ոչ թե գնել նրա բնական գազը

Եվրամիությունը (ԵՄ) պետք է պատժամիջոցներ կիրառի Ադրբեջանի դեմ, այս մասին Tempi-ին տված հարցազրույցում հայտարարել է Եվրախորհրդարանի եվրոպական պահպանողականների և ռեֆորմիստների խմբի գերմանացի անդամ, վերջինիս արտաքին հարաբերությունների հանձնաժողովի անդամ Լարս Պատրիկ Բերգը։ Նա մեղադրել է ԵՄ-ին հայերին չպաշտպանելու և ադրբեջանական բնական գազի մատակարարումները անմեղ մարդկանց կյանքին նախընտրելու մեջ։ Ցինիկը կարող է մտածել, որ Եվրահանձնաժողովի նախագահ Ուրսուլա ֆոն դեր Լեյենը ադրբեջանական բնական գազի մատակարարումն ավելի կարևոր է համարել, քան հայերի կյանքը, Ադրբեջանի նախագահ Ալիևը երբեք հուսալի գործընկեր չի եղել, և պատժամիջոցներն անհրաժեշտ են, ասել է Բերգը։ Գերմանիայի Բունդեսթագի «Կանաչների» կուսակցությունից պատգամավոր Անտոն Հոֆրեյթերը նույնպես կոչ է արել ԵՄ-ին անհապաղ պատժամիջոցներ կիրառել Ադրբեջանի դեմ։ Եվրոպացիները պետք է «ստիպեն իրենց տնտեսական պատժամիջոցներ սահմանել, նույնիսկ եթե դա դժվար լինի»,- ասել է նա Funke մեդիա խմբի թերթերին։ «Մենք պետք է որքան հնարավոր է շուտ դադարեցնենք [բնական] գազ գնել Ադրբեջանից»,- պահանջել է Հոֆրեյթերը։ Արցախի (Լեռնային Ղարաբաղի) դեմ Ադրբեջանի հարձակումը «բռնապետից կախվածության մեծ վտանգի ևս մեկ օրինակ է»։ Ավտորիտար Ադրբեջանից բնական գազ գնելու փոխարեն ԵՄ երկրները պետք է «հենվեն այլ աղբյուրների և առաջին հերթին էներգիայի վերականգնվող աղբյուրների վրա»։